GARBUS wan Tulamak sudah babulan-bulan umpat prugram kajar paket A tapi tatap kada lancar mambaca. Mungkin utak bubuhannya itu sudah katuhaan, makanya kada kuat lagi mahafal. Makanya bubuhannya badua itu manyasal banar, kanapa wayah lagi anum dahulu kada hakun umpat sakulah.“Kita kada parlu manyasal Bus ai, biar haja kita bungul mambaca asal kita kawa manyakulahakan anak,” ujar Tulamak.
“Hi-ih, sabujurnya sual baca tulis itu kada tapi parlu jua karna biarpun kada sakulah, buta huruf, buta kakap pasti paham haja haraga duit nang batulisan saribu, lima ribu, sapuluh ribu habang sampai saratus ribu nang bagambar Soekarno Hatta,” ujar Garbus.
“Napa pina rami mamander bacaan tulisan ribuan,” ujar Palui nang hanyar datang umpat batakun.
“Kami bakisah sual sakulah paket A Lui ai, sudah babulan-bulan balajar balum bisa jua mambaca. Tulung pang kaya apa caranya, maka ikam bisa lancar banar mambaca,” ujar Garbus.
“Kalu si Palui kada kawa diumpati karna inya sudah biasa sakulah dan sudah biasa bagawi di kantur pambakal,” ujar Tulamak.
“Tapi biarpun inya sudah sakulah dan sudah biasa bagawi nyatanya wayahini kulihat inya bauju tunggal bigian jua mambaca,” ujar Garbus mamahapak Palui.
“Samalam bujur haja aku bauju mambaca, tapi wayahini sudah lancar, cuba dangarakan aku mambaca surat kabar ini,” ujar Palui mambaca imbah inya mamasang kacamata.
“Oooo......... jadi imbah ikam bakacamata, lalu lancar mambaca?” ujar Garbus.
“Barakat kacamata inilah maka aku lancar mambaca karna memang kacamata ini adalah kacamata mambaca,” ujar Palui baagak
“Kalu kaya itu isuk kita tulakan ka pasar umpat manukar kacamata pintar
mambaca itu,” ujar Tulamak. Lalu isuknya, bubuhannya tulakan ka pasar mancari’i tuku wadah Palui manukar kacamata lancar mambaca.
“Nah, itu nah sama wan kacamata Palui, kacamata putih tabal kacanya,” ujar Tulamak wan Garbus. Imbah mamasang kacamata tabal itu lalu inya minta cariakan suratkabar handak mambaca.
“Huruf-hurufnya baganal Bus ai, tapi aku kada kawa mambaca jua,” ujarnya.
“Kacamata ini kacamata kaur gasan mambaca, jadi kada kacamata pintar mambaca. Mata sampiyan kaurlah?” ujar panjaga tuku manakuni.
“Mata kami baik haja, hanya kami balum tamat sakulah paket kejar A jadi kami balum lancar mambaca,” ujar Garbus mangaku.
“Kalu balum bisa mambaca baiknya manukar kacamata hirang haja, biar kada bisa mambaca tapi aksi,” ujar panjaga tuku mahuhulut bubuhannya. (tam)
Source: BPost
