Liwar sayang inya lawan aluh anaknya nang babinian itu, kamana haja dibawanya. Maka nang anak itu katuju jua umpat Palui. Rikit tu pang. Bila palui tulak bagawi, si Aluh pasti manangisi.
“Kaya apa habar nang halus Lui? ujar Tulamak manakuni rahatan takumpul di pangkalan.
“Alhamdulillah sihat haja, urangnya gagah banar mak ai, kada katangkapan,” ujar Palui kahimungan mangisahakan anaknya aluh.
“Mandai haja ikam wayahini katuju bulik badahulu,” ujar Tulamak.
“Hi-ih, Aku tu katuju malihati anakku Aluh tu, sambil jua pang malihati umanya,” ujar palui lihum.
“baapa ikam malihati bini ikam, inya ganal haja,” ujar garbus kada paham.
“Ikam ini dasar datunya pambabal Bus ai,” ujar palui lalu parmisi bapadah bulik karumah. Tabarungan jua wayah makan siang. Tapi imbah itu bajam-jam inya kada sing cangulan.
“Kanapa lawasnya Palui bulik?” ujar Garbus manakuni tulamak.
“Kalu inya manyuapi makan nang anak,” ujar Tulamak manangguh.
“Mun kaya itu kita karumahnya mak, kada rami jua kadada Palui.”
“Akur Bus ai, kita lawas kada karumah Palui, aku handak mamutik nyiurnya haja nah,” ujar Tulamak langsung bubuhannya tulakan ka rumah Palui.
“Kamanaan ini pina sunyi?” ujar tulamak.
“assalalmuaikum,” ujar Garbus kukuciak matan luar.
“Waalikum salam, Eh bubuhan ikam kah,” ujar palui matan dalam mambukai lawang.
“Napa Lui pina batapih-tapih, handak ka masigitkah ikam? ujar Garbus hiran.
“Ini hari kamis Bus ai, isuk hanyar ka masigit,” ujar Palui sambil mambujuraakan ka tapih.
“Aku handak mambor sumur,” ujar Palui babisik sambil lihum.
“Kanapa wan sumur ikam Lui? Karingkah?” ujar Garbus.
“Sumur Palui lawas karuh Bus ai. Jadi wayahini saban hari inya mambor lagi. Kalu kaya itu kami parmisi bulik haja,” ujar Tulamak paham.
“Hadang dulu! Bubuhan ikam ini maulah bingung aku haja, samalam bapadah sumur karuh, padahal barasih haja. Limbah itu hari ini bapadah handak mambor sumur. Padahal sumurnya baik haja, lancar haja banyunya,” ujar Garbus garu-garu kapala. “Lalu kalu Palui handak mambor sumur, baiknya kita jangan bulikan Mak ai. Sabagai kawan nang baik kita gani-i inya bagawian,” ujarnya pulang.
“Bawai bulik gin Mak ai, Garbus nang pambabal wan kada tapi pintar ini. Malambati haja,” ujar Palui hancap manutup ka lawang mandangar handak digani i Garbus mambor sumur ampun inya. (bpt/fai)
Sumber: BPost
