“Kita harus hati-hati, mantapkan niat baziarah, di jalan jangan bapander nang mahaluya dan patuhilah aturan serta tata tertib baziarah,” ujar Palui manasihati kakawanannya.
Kada lawas imbah Palui banasihat dan bajalan di tanah nang mananjak serta balucak itu, Garbus wan Tulamak taimbai malihat ada duit lembaran Rp5.000 di tanah, lalu kaduduanya bagagas handak manjumputnya.
“Stop, stop, duit itu jangan diambil. Ini tamasuk salah satu larangan, ujian dan cubaan kepada kita. Satiap barang yang ada atau gugur di tanah di daerah keramat ini jangan diambil, jangan dijumput, biarakan haja... Di sini tamasuk daerah hukum karma,” ujar Palui manambahi pantangan atawa larangan nang kada bulih dilanggar bagi peziarah.
“Maaf Lui-lah, kami kada ingat pantangan nang ikam sambat tadi, makanya kami baniat manjumput lembaran Rp 5.000 itu,” ujar Garbus hanyar sadar.
Parjalanan manuju wadah keramat itu makin ka atas tanahnya makin licin hingga harus hati-hati dan bajalan sambil baingkut di pagar tanaman. Kada lawas Garbus wan Palui mandangar bunyi: Buk, buukkk... lalu tagalingsir.
“Bunyi napa mandabuk di balakang kita itu Lui?” ujar Garbus.
“Mungkin ada barang nang gugur..,” ujar Palui manyahut.
Palui wan Garbus tapaksa manulih handak tahu bunyi napa nang pina mandabuk itu.
“Lui, Lui, bunyi mandabuk tadi tanyata kawal kita si Tulamak tahantak wan taguling ka bawah,” ujar Garbus sambil manunjuk Tulamak nang bacalumut wan lucak.
“Ayu kita tulungi,” ujar Palui mambawai Garbus.
“Sasuai pantangan nang ikam sambat tadi bahwa setiap nang gugur ka tanah kada bulih dijumput, jangan diambil, tamasuk kawal kita itu. Biarakan haja inya bausaha saurang,” ujar Garbus mambulikakan panderan Palui.
“Tulung, tuluuuuung...,” ujar Tulamak kukuriak maminta tulung sambil bakisut mancari ingkutan handak badiri. (tam)
